ഏത് രാജാവാണിവിടെ നഗ്നനല്ലാത്തത്?

 അങ്ങനെ സാംസ്കാരിക കേരളത്തിനു ചർച്ച ചെയ്യാനും പതിവു പോലെ മറക്കാനും ഒരു വിഷയം കൂടി.

ഇരതേടുന്ന ചെന്നായ്ക്കൾക്ക് മാൻ‌കുട്ടിയെ കിട്ടിയ ഭാവത്തോടെ, ഇന്ത്യാവിഷനും, റിപ്പോർട്ടറും, ഏഷ്യാനെറ്റും, മനോരമ ന്യൂസും ഒക്കെ മൽസരിച്ച് ലൈവ് പ്രക്ഷേപണങ്ങൾ ചെയ്തു.

ത്രികോണചർച്ചകളിൽ പതിവു താർക്കികന്മാരായ പി സി ജോർജ്ജും,സുധാകരനും,തിരുവഞ്ചൂരും,വി മുരളീധരനും,ശ്രീധരൻപിള്ളയും, ഐസക്കും, പിണറായിയും, ആനത്തലവട്ടവും, ഉമ്മൻ‌ ചാണ്ടിയും, ചെന്നിത്തലയും, അബ്ദുള്ളക്കുട്ടിയുമൊക്കെ മൽസരിച്ച് സൂക്ഷ്മതയോടെ ചെസ്സ് കളിച്ചു.  …

എല്ലാവർക്കും പട്ടും വളയും കിട്ടുകയും അവസാനം ചായ കുടിച്ച് പിരിഞ്ഞ് പോവുകയും ചെയ്തു.

പറഞ്ഞു വന്നത് ആദർശത്തിന്റെ പേരിൽ മാത്രം പാർട്ടിയിൽ നിന്ന് സ്വയം പുറത്ത് വന്ന ധീരനായ കമ്യൂണിസ്റ്റുകാരന്റെ കൊലപാതക വാർത്തയേക്കുറിച്ചാണു…

തിരഞ്ഞെടുപ്പിൽ ലീഡ് നില കൂടുകയും കുറയുകയും ചെയ്തതു പോലെ, ആരാണു ഉത്തരവാദി എന്ന നിഗമനങ്ങൾ മാറി മറിഞ്ഞെങ്കിലും അവസാനം ഒരു ദിശയിലേക്ക് ചൂണ്ടുന്നതു പോലുണ്ട്…

എല്ലാവരുടെയും പ്രതീക്ഷ ആ ഗുണ്ടകളെ അകത്താക്കി ഇതിലെ സൂത്രധാരനെ ഇപ്പോൾതന്നെ വെളിയിൽ കൊണ്ട് വരും എന്നാണു..

പോരാത്തതിനു ആരോപണവിധേയർ പ്രതിപക്ഷത്തും…..

ഒരിക്കലുമില്ല മക്കളേ ഒരിക്കലുമില്ല!!!

ജീവിക്കാൻ ഒരു ജോലി എന്ന മുദ്രാവാക്യവുമായി പോലീസിൽ കയറുന്ന പാവപ്പെട്ട പോലീസുകാരനൊന്നും ഒരു രാഷ്ട്രീയനേതാവിന്റെയും രോമത്തിലും തൊടില്ല…

അത് പ്രതിപക്ഷമായാലും,ഭരണപക്ഷമായാലും, ആളില്ലാപാർട്ടിയായാലും ശരി.

അവർക്ക് കസ്റ്റഡിയിലെടുക്കാൻ കൂടിയാൽ അന്തിയേരി സുരയും, കൊടി സുനിയും, കുറച്ച് വാടകക്കാരും ധാരാളം.

അന്തിയേരിക്കെന്ത്!!!!…. പാവപ്പെട്ടവന്റെ പോക്കറ്റിൽ കൈയിട്ട് വാരുന്ന ബക്കറ്റ് പിരിവുകാരുണ്ട് വീട്ട്ചെലവു നടത്താനും, കല്യാണം നടത്താനും.

ഒരു ജോലിയും ചെയ്യാതെ സസുഖം വാഴാൻ സെൻട്രൽ ജയിലുകളും, ഒരു പ്ലഷർട്രിപ്പ് വേണമെന്ന് തോന്നുമ്പോഴൊക്കെ പരോളും കിട്ടും.

യുഡിഎഫും,എൽഡിഎഫും,എൻഡിഎഫും,ലീഗും,ബിജെപിയും,ആർഎസ്സെസ്സുമെല്ലാം വളർത്തിയെടുത്ത ഒരു പാട് അന്തിയേരികൾ ജയിലുകളിലും, പുറത്തും വിഹരിക്കുന്നു. ചിലർ ജയിലുദ്യോഗസ്ഥരുടെ തോളിൽ കയ്യിട്ട് നടക്കുന്നു.

അവർക്ക് കിട്ടാത്തതൊന്നുമില്ലെന്നും, രാഷ്ട്രീയതടവുകാരുടെ തടവ് പേടിച്ച് ആ ഭാഗത്തേക്ക് മിക്കവാറും ജയിൽ ഉദ്യോഗസ്ഥരും പോവില്ലെന്നും അടുത്ത് പറഞ്ഞത് മുൻ ഡിജിപി എംജിഎം രാമൻ തന്നെയല്ലേ…

“ക്രിമിനലുകൾ നേത്യത്തത്തിലില്ലാത്ത,അഴിമതി പുരളാത്ത, ക്വൊട്ടേഷൻ സംഘങ്ങളെ പാലു കൊടുത്ത് വളർത്താത്ത ,വർഗ്ഗിയതയില്ലാത്ത, മതപുരോഹിതന്മാരുടെ തിണ്ണ നിരങ്ങാത്ത, രക്തക്കറ വീഴാത്ത, ഒരു പ്രധാന പാർട്ടിയും ഇന്ന് കേരളത്തിലില്ലെന്ന നഗ്നസത്യം നിലനിൽക്കേ യുഡിഎഫിന്റെയും, ബിജെപിയുടെയും വിശുദ്ധത ചമയലും അപഹാസ്യമാണെന്ന് ജനങ്ങൾക്ക് നന്നായറിയാം. “

ജനങ്ങൾ എന്നാൽ ഞാനുദ്ദേശിച്ചത് എല്ലാം മനസ്സിലാക്കികാണുന്ന, എന്നാൽ പാർട്ടികളെ പേടിച്ച് ചിരിച്ച മുഖത്തോടെ ബക്കറ്റ് പിരിവും, മെബർഷിപ്പ് ഫീയും കൊടുത്ത് പോരുന്ന, വിലക്കയറ്റവും, ദാരിദ്രവും സഹിച്ച് ടാക്സ് ക്യത്യമായടച്ച് ജീവിക്കുന്ന ഒരു സമൂഹത്തേക്കുറിച്ചാണു,

അല്ലാതെ കണ്ണടച്ച് ഇരുട്ടാക്കി, സ്വന്തം പാർട്ടി മാത്രം ശരി എന്നും അതിന്റെ നേതാക്കൾ മാത്രം വിശുദ്ധപുണ്യാളന്മാർ എന്നും കരുതി ജീവിക്കുന്ന കടുത്തപാർട്ടിസ്നേഹികളേക്കുറിച്ചല്ല. അവർക്ക് മറ്റുള്ളവരുടെ മുൻപിൽ സത്യത്തെ അംഗീകരിക്കാൻ എങ്ങനെ സാധിക്കാൻ. എന്നാൽ പോലും , തിരിച്ച് എത്ര തർക്കിച്ചാലും, ഒരു സന്ദേഹം അവരുടെ ഉള്ളിൽ ബാക്കിയാവുമെന്നും, പരിധികൾ ലംഘിച്ചാൽ ഒഞ്ചിയം എവിടെയുമുണ്ടാവുമെന്നും പ്രത്യാശിക്കാം.

ഈ പാർട്ടികളിലെ ക്യമിനലുകൾ പരസ്പരം കൊന്ന് കൊലവിളിച്ച ഒരുപാട് ചന്ദ്രശേഖരന്മാരുണ്ട്, കെ കുഞ്ഞാലിയുണ്ട്, അഴീക്കോടൻ രാഘവനുണ്ട്, സുധീഷുണ്ട്, പന്ന്യന്നൂർ ചന്ദ്രനുണ്ട്, ജയക്യഷ്ണൻ മാഷുണ്ട്, പട്ടുവത്തെ ഷുക്കൂറുണ്ട്, പിന്നെ പേരു പോലും വിസ്മ്യതിയിലാണ്ടു പോയ ഒരു പാട് രക്തസാക്ഷികളുണ്ട്.

എല്ലാവരുടെയും രക്തത്തിന്റെ നിറം ഒന്നായിരുന്നു, അവരുടെ വീടുകളിലുയർന്നതു ഒരേ വികാരത്തിന്റെ നിലവിളിയായിരുന്നു.

അവരിൽ ചിലർ നിരപരാധികളായിരുന്നു, ചിലർ പക്ഷേ വാളെടുത്തവൻ വാളാൽ എന്ന നിയമത്തിന്റെ മുന്നിൽ കീഴടങ്ങിയവരും.

പല വർണ്ണത്തിലുള്ള കൊടികൾ പുതപ്പിച്ച് പാർട്ടികൾ രക്തസാക്ഷിഅക്കൗണ്ടിൽ ഒരക്കം കൂട്ടിയെഴുതുകയും, ഹർത്താൽ നടത്തുകയും ചെയ്തപ്പോഴും, അതിന്റെ പിന്നിലെ യഥാർത്ഥ സൂത്രധാരന്മാർ പിന്നാമുറങ്ങളിലിരുന്ന് ചിരിച്ചു.

കണ്ണൂരിലെ ഇടതിന്റെ ധാർഷ്ട്യത്തിനു മറുപടി പറയാൻ ഗുണ്ടാസംഘത്തെ തീറ്റിപോറ്റുന്ന നേതാവിനെ ആർക്കാണറിയാത്തത്!!?? നാദാപുരത്ത് വർഗ്ഗീയതയുടെ അമ്പ് എയ്തത് ആരാണെന്ന് ആർക്കാണറിയാത്തത് ? പെണ്ണുകേസില്പെട്ട മന്ത്രിപുത്രന്മാരെ ആർക്കാണറിയാത്തത്?

രക്തസാക്ഷികളെ ചിലപ്പോഴെങ്കിലും ഓർത്തിരിക്കുന്നത് പെറ്റമ്മമാരും, ഭാര്യമാരും, മക്കളും മാത്രമാവും ഇന്ന്.

കൂത്ത്പറമ്പിൽ അഞ്ച് യുവത്വം ബലികഴിച്ചവർ അധികാരത്തിലേറിയിട്ട് സാശ്രയവിദ്യഭ്യാസത്തിനെതിരായി എന്ത് ചെയ്തു ?

ഭാരതത്തിന്റെ സ്വാതന്ത്യത്തിനു വേണ്ടി പോരാടിയവരുടെ തലമുറക്കാർ കാർഗിലിൽ രാജ്യത്തിനു വേണ്ടി യുദ്ധം ചെയ്ത പട്ടാളക്കാരന്റെ ശവപ്പെട്ടിയിൽ അഴിമതി കാട്ടിയില്ലേ ? കുത്തകകൾക്ക് 2ജിയും, പെട്രോളുമെല്ലാം തീറെഴുതിക്കൊടുത്തില്ലേ ? ഇറ്റാലിയൻ സൈനികരെ കണ്ടപ്പോൾ സാഷ്ടാംഗം നമസ്കരിച്ചില്ലേ ? എണ്ണിയാലൊടുത്ത അഴിമതികളുടെ ഗന്ധം പേറുന്ന ആ പാർട്ടിയ്ടെ ആയമ്മക്ക് കോടാനുകോടി ആസ്തികൾ എവിടെനിന്നെന്ന് ആർക്കുമറിയില്ല!!

അഴിമതിക്കെതിരെ വിശുദ്ധയുദ്ധവുമായി വന്ന ഹസാരെയെ ശകുനിയുടെ തന്ത്രങ്ങളോടെ മൂലക്കിരുത്തുന്ന തന്ത്രങ്ങൾ ഭീതിപ്പെടുത്തും.

ദുർഗന്ധം വമിക്കുന്ന അഞ്ചാംമന്ത്രിക്കസേരയും,  റജീനയുടെയും, റൗഫിന്റെയും വെളിപ്പെടുത്തലുകളുമൊന്നും ആർക്കുമറിയാത്തതല്ല

ഭരിക്കേണ്ട സമയത്ത് അശ്ലീല വീഡിയോ കണ്ട് രസിക്കുന്ന,പിന്നെ സൗത്ത് ഇന്ത്യയിൽ ഭരിക്കുന്ന ഏക സംസ്ഥാനത്ത് അഴിമതിയുടെ കൊടുമുടി കയറിയ മുഖ്യമന്ത്രിയെ നിവ്യത്തികേടുകൊണ്ട് സഹിക്കുന്ന പാർട്ടിക്കും മേന്മയൊന്നും അവകാശപ്പെടാനാവില്ല.

വിവാദങ്ങളിൽ പെട്ടുഴലുകയായിരുന്ന യുഡിഎഫിനു നെയ്യാറ്റിങ്കരയിലേക്ക് കിട്ടിയ ഒരു കച്ചിത്തുരുമ്പായിരുന്നു ടിപി വധം…

പുരകത്തുമ്പോൾ വാഴവെട്ടുന്ന, വലിയവായിൽ വർത്തമാനിക്കുന്ന ഇക്കൂട്ടരെ കാണുമ്പോൾ , സന്ദേശം എന്ന ചിത്രത്തിൽ രക്തസാക്ഷിക്ക് വേണ്ടി കടിപിടി കൂടുന്ന മാമുക്കോയയോട് ഉപമിക്കാനെ കഴിയൂ.

ഈ എട്ടുകാലിമമ്മൂഞ്ഞുകൾ എന്തേ അപകടഭീഷണിയുണ്ട് എന്ന് പറഞ്ഞ സഖാവിനു സംരക്ഷണം നൽകിയില്ല ?

സിപിഎമ്മിന്റെ കൊട്ടേഷൻ സംഘങ്ങളെക്കുറിച്ച് ഉത്തമബോധ്യമുള്ളവർ എന്തേ പോലീസ് സേനയെ ഉപയോഗിച്ച് കൈകാര്യം ചെയ്തില്ലെ ?

എന്തേ കുത്തഴിഞ്ഞ ജയിലുകൾ നേരെയാക്കിയില്ല ?

കൊലപാതകം നടന്ന് മണിക്കൂറുകൾക്കുള്ളിൽ തെളിവ് കണ്ടുപിടിക്കാൻ കഴിവുള്ള പോലീസ് സേന ഉള്ളപ്പോൾ എന്തേ മുൻപ് നടന്ന രാഷ്ട്രീയ കൊലകളിലെ യഥാർത്ഥപ്രതികളെ കണ്ടെത്താൻ ഉപയോഗിച്ചില്ല!!!

സോറി സർ!!! എല്ലാം പൊളിറ്റിക്കൽ ഡ്രാമ ആണെന്നറിയാം അടിയങ്ങൾക്ക്

കൂട്ടത്തിലൊരാൾ മരിച്ച വേദനയിൽ അകം നൊന്ത്, സത്യമൊരു നാൾ തെളിയുമെന്ന് കരുതുന്ന ഞങ്ങൾ ഒരു കൂട്ടർ ഇവിടുണ്ട്, അധികാരരാഷ്ട്രീയത്തിന്റെ ഇടനാഴികളിൽ കാലിടറിയ ഇടത് രാഷ്ട്രീയത്തിന്റെ ഭൂതകാലത്തെയും, കമ്മ്യൂണിസം എന്ന ആശയത്തെയും ഇഷ്ടപ്പെടുന്നവർ, ഗാന്ധിജിയെയും,  അഹിംസ വാദത്തെയും, വി എസ്സിന്റെ ചില നിലപാടുകളെയും, ആന്റണിയുടെ ലാളിത്യത്തെയും, വാജ്പേയിയെയും ഒക്കെ ഇഷ്ടപെട്ടർ….. കാലമൊരുപാടു കഴിഞ്ഞാലും,  സത്യം പുലരട്ടെ.

മാര്‍പ്പാപ്പയെ കുര്‍ബാന പഠിപ്പിക്കുന്നോ

 

 ബൂലോകത്തില്‍ വായിക്കാന്‍http://boolokam.com/archives/44435

വളരെ ആധികാരികമായാണു കരുണനും ഞാനും ഇത് ചര്‍ച്ച ചെയ്തത്.
തിരഞ്ഞെടുപ്പില്‍ ഒരു സമവായം ഉണ്ടാവുന്നതിനേപ്പറ്റി കരുണന്റെ മാത്രമല്ല, ഞങ്ങടെ അസോസിയേഷനിലെ കമ്പ്ലീറ്റ് ലവന്മാരുടെയും മുഖദര്‍ശനം നടത്തി മാഡംജി പറയുന്ന ആള്‍ക്ക് ആ പട്ടം വാങ്ങിച്ച് കൊടുക്കണമല്ലോ….
കുഞ്ഞമ്മയെ ഇരുത്തി ആ സ്ഥാനത്തിന്റെ മഹിമ കളഞ്ഞൂന്നാണു ഡിസ്കസ് ചെയ്ത എല്ലാരും പറേണതു.
ഇതിനു മാത്രം എന്ത് തെറ്റാണു ആയമ്മ ചെയ്തത് ?
വളരെ പൈശാചികവും ക്രൂരവുമായിപ്പോയില്ലേ അപവാദങ്ങള്‍!!
ഒന്നുമില്ലേലും അവരു മമതെയെപ്പോലോ ജയലളിതയെപ്പോലോ അല്ലല്ലോ ?
ഫ്രീ ആയിട്ടൊള്ള ടൂര്‍ പാക്കേജ് അവരും കുട്യോളും ഉപയോഗിച്ചെന്നേ ഒള്ള്.
അവര്‍ക്ക് പത്തറുപതു ബന്ധുക്കളുണ്ടായത് അവരുടെ തെറ്റാണോ ? വയസ്സ് 78 ആയിട്ടും വിവിധരാജ്യങ്ങളില്‍ ഓടിച്ചാടി നടന്നില്ലേ ?
ഇനീം രാജ്യങ്ങള്‍ എത്ര ബാക്കി കിടക്കുന്നു എന്നാണവരു പറേണതു.
പക്ഷേങ്കീ അവരുടെ കാര്യം പരിഗണിക്കണ്ടാന്ന് വച്ചത് വേറൊന്നു കൊണ്ടാണു…
രാഷ്ട്രപതി എന്ന് പറഞ്ഞാല്‍ സ്ത്രീയാകുന്ന രാഷ്ട്രത്തിനു പതി എന്നല്ലേ അര്‍ത്ഥം ?…
അപ്പോള്‍ അതൊരു പുരുഷന്‍ തന്നല്ലേ ആവേണ്ടത് ?
രാഷ്ട്രഭാര്യ എന്ന് വിളിച്ചാല്‍ ശെരിയല്ല… ഛേയ്….
രാഷ്ട്രപതിച്ചി എന്ന് ചിലര്‍ വിളിക്കുന്നത് കേട്ടു….. … അതിലൊരു എന്തോ!!..
അതോണ്ട് അതൊരു പുരുഷനായാല്‍ ആര്‍ക്കും ഈ പ്രശ്നങ്ങളൊന്നൂല്ലാന്ന്!!!
പിന്നെ കരുവിനു ഇതൊന്നും വിഷയമുള്ള കാര്യമേയല്ല.. പാവം കണ്ട ഒടനേ മുറി അടച്ചിട്ട് ഒറ്റക്കരച്ചിലാരുന്നു….
“തമ്പീ കുളന്തെകളെല്ലം അങ്കെ ജയിലിലാച്ച് … ഇന്ത കിളവനുക്ക് യാരുമേ ഇല്ലൈ”……….. ഹോ കണ്ണ് നിറഞ്ഞ് പോയി!!!
മമതാജിക്ക് ഒറ്റക്കണ്ടീഷനേ കാണു…. ആരായാലും ഗൊള്ളാം, മുള്ളിത്തെറിച്ച ബന്ധത്തില്‍ പ്പോലും ഒറ്റ സിപീമ്മുകാരു പാടില്ലാന്ന്….
ഇമ്മാതിരി കണ്ടീഷനെല്ലാംകൂടെ ഒത്ത് വരുന്നതിനാ ഈ സമവായം സമവായം എന്ന് പറേണത്..
ചെലരൊക്കെ പറേണതു കലാംജിക്ക് ഒരു ചാന്‍സൂടെ കൊടുക്കണംന്നാണു…
കാള പെറ്റൂന്ന് കേട്ടാ ഓടണ സോഷ്യന്‍ നെറ്റ്വര്‍ക്കും മീഡിയേം കൂടെ ഓടാന്‍ തൊടങ്ങീട്ടൊണ്ട്…
സമവായത്തിനു ആരേം കിട്ടീല്ലേ ചിലപ്പോ കൊടുത്തെന്നിരിക്കും, പക്ഷേങ്കീ ആദ്യത്തെ പ്രസിഡന്റിനു ശേഷം അങ്ങനൊരു പതിവില്ലാല്ലോ…
പിന്നെ രണ്ട് ഓലപ്പടക്കോം കമ്പിത്തിരീം കത്തിച്ച് പുതിയ സന്തോഷ് പണ്ഡിറ്റ് പടം വരുമ്പളോ ഇറ്റാലിയന്‍ കപ്പലു വരുമ്പളും അതിന്റെ പൊറകേ പൊയ്ക്കോളും..
ഹസാരെയെ മൂലക്കിരുത്തിക്കഴിഞ്ഞപ്പോ ഞങ്ങ ഇവന്മാരെ ഒക്കെ കൈകാര്യം ചെയ്യണ്ട വിധം പഠിച്ചില്ലേ..
മുല്ലപ്പെരിയാറും, എന്റിക്കലെക്സിയും ഒക്കെ എങ്ങനെ മാക്സിമം ഉപയോഗിച്ചിട്ട് അഭിസാരികയെപ്പോലെ കളയാം എന്ന് പഠിച്ച് പാസ്സായ ഞങ്ങളോടാ കളി.
അതോണ്ട് പറയുവാ… എല്ലാം മാഡംജി തീരുമാനിക്കും, നിങ്ങ കൈയ്യടിച്ചാ മതി!!!
മാര്‍പ്പാപ്പയെ കുര്‍ബാന പഠിപ്പിക്കുന്നോ !!!!!!!!!!!!
——————————————
ഇനി കാര്യത്തിലേക്ക് വരട്ടെ .
ആദരണീയമായതും ഏതൊരു ഇന്ത്യക്കാരനും എത്താവുന്നതില്‍ പരമോന്നത പദവിയുമായ രാഷ്ട്രപതി എന്ന സ്ഥാനത്ത് ലോകത്തിനു മുന്നില്‍ അഭിമാനത്തോടെ ചൂണ്ടിക്കാണിക്കാന്‍ ഒരു വ്യക്തി വേണം ഞങ്ങള്‍ക്ക്. അത്യാവശ്യഘട്ടങ്ങളില്‍ നിര്‍ണ്ണായക തീരുമാനമെടുക്കാന്‍ പ്രാപ്തിയുള്ള ഒരാള്‍.
അബ്ദുള്‍കലാം അതു പോലൊരാളാണു..
അമര്‍ത്യസെന്നും, അണ്ണാ ഹസാരെയും,നാരായണമൂര്‍ത്തിയും, നമുക്കുണ്ട്
സ്ത്രീകള്‍ ഈ സ്ഥാനത്തിനു അര്‍ഹരല്ല എന്നു പറഞ്ഞാല്‍ തെറ്റാവും, മേധാപട്കറും, ഷീലദീക്ഷിത്തും, കിരണ്‍ബേദിയും ഒക്കെ കഴിവുള്ളവരാണു
റബര്‍സ്റ്റാമ്പുകളും ഡിക്ടേറ്ററുകളും സമവായത്തിന്റെ പേരില്‍ വരാതിരിക്കാന്‍ മാത്രം ആഗ്രഹിക്കാം നമുക്ക്
———————

കപടസദാചാരം എന്ന ന്യൂജനറേഷന്‍സുന

മനശാസ്ത്രം പക്തിയിലെ പ്രിയ ഡോക്ടര്‍ ഇട്ട്യാസ് വായിച്ചറിയാന്‍,

ഈ കോതയ്ക്ക് വല്യ വിവരം ഒന്നും ഇല്ല, വിദ്യാഭ്യാസം പണ്ടേ ഇല്ല.

ഒരു സംശയം തീര്‍ക്കാന്‍ ആണു ഈ എഴുത്ത് എഴുതുന്നത്.

" എന്റെ പെണ്ണുമ്പിള്ള തങ്കയും അയല്വക്കത്തെ ഗോപിയും ഡിങ്കോള്‍ഫി ആണെന്നുള്ളത് അങ്ങാടിപ്പാട്ടായിരിക്കുന്ന ഒരു ദുര്‍ഘടസന്ധിയിലാണു ഞാന്‍.

തദവസരത്തില്‍ രണ്ടിനേം തെളിവു സഹിതം പിടിക്കണമെന്നും, നിഷ്കളങ്കയായ എന്റെ ഭാര്യയെ വളച്ചെടുത്ത ഗോപിയെ രണ്ട് പെട പെടക്കണമെന്നും ഞാന്‍ തീവ്രമായി ആഗ്രഹിക്കുന്നു,

ശാരീരികമായി ഗോപിയുടെ അത്രക്ക് ശുഷ്കാന്തി ഇല്ലാത്തതു കൊണ്ട് ഒറ്റയ്ക്ക് പോയാല്‍ നെഞ്ചാംകൂട് കലങ്ങും എന്നുറപ്പാണു.

ആയതിനാല്‍  എന്‍റ്റെ ഷാപ്പ്മേറ്റ് ആയ കണാരനെ മാത്രമേ സഹായത്തിനു കാണുന്നുള്ളു. ഒരു പൈന്റ് കിട്ടിയാല്‍ അവന്‍ എന്തും ചെയ്യുന്നവനാണു.

എല്ലാം ഈയുള്ളവന്‍ തീരുമാനിച്ച് ഉറപ്പിച്ചതായിരുന്നു,

പക്ഷേ ഈയിടെയായി പത്രവാര്‍ത്തകള്‍ കണ്ട് വല്ലാത്ത സംശയത്തിലും പേടിയിലുമാണു...

സംശയം ഇതാണു.

ഗോപിയെ ഞാനും കണാരനും ചേര്‍ന്ന് തല്ലിയാല്‍ എന്നെ ആളുകള്‍ കപടസദാചാരവാദി എന്ന് വിളിച്ചാക്ഷേപിക്കുമോ ? അഥവാ ഗോപിക്ക് വല്ലതും സംഭവിച്ചാല്‍ സദാചാരക്കൊലപാതകം എന്ന പേരില്‍ ഞങ്ങളെ തൂക്കിക്കൊല്ലുമോ ??????????


കാമുകന്‍‌റ്റെ തല വെട്ടി എടുക്കുന്ന ഭര്‍ത്താവിനു പണ്ടൊക്കെ ഒരുമാതിരി വീരപരിവേഷമായിരുന്നു.
കുളിമുറിയില്‍ ഒളിഞ്ഞ് നോക്കുന്നവനെയും കള്ളപ്പരിപാടിക്ക് പോവുന്നവനെയും ആരുടെ ഭാര്യയോട് ചെയ്തു എന്ന് നോക്കാതെ രണ്ട് പൂശ് പൂശിവിടുന്നതായിരുന്നു അന്നത്തെ ഒരു രീതി..

പത്രത്തില്‍ ഒരു വാര്‍ത്ത വന്നാലും "അനാശാസ്യം നാട്ടുകാര്‍ പിടിച്ചു, പ്രതികളെ മര്‍ദ്ദിച്ചു" എന്നൊക്കെയായിരുന്നുവല്ലോ.

"സദാചാരക്കൊലപാതകം പാപം", കപടസദാചാരവാദികളെ തല്ലിക്കൊല്ലണം എന്നൊക്കെയുള്ള ചര്‍ച്ചകള്‍ ടീവിയില്‍ കണ്ട് തല പെരുക്കുന്നു ഡോക്ടര്‍...

എന്താണു ഞാന്‍ ചെയ്യേണ്ടതു ഡോക്ടര്‍?, അങ്ങ് മാത്രമേ ഈയുള്ളവനു ആശ്രയമുള്ളു.

ഒരു മറുപടി കാത്ത്

പാവം കോത.

ഒപ്പ്

----------------------------------

പ്രിയ കോതേ,

കത്ത് കിട്ടി ബോധിച്ചു,

സത്യത്തില്‍ കോതയുടെ മനസ്സ് ന്യൂജനറേഷനു അനുപാതമായി വികസിച്ചിട്ടില്ല എന്നതാണു പ്രശ്നം. ഡോക്ടര്‍ക്ക് ഇതു നന്നായി മനസ്സിലാവും, കാരണം കുറച്ച് നാള്‍ മുന്‍പ് വരെ ഞാനും അത്രയ്ക്കങ്ങ് വികസിച്ചിരുന്നില്ല.

ഒരുദാഹരണം പറയാം, കുറച്ച് കാലം മുന്‍പ് ഞാന്‍ ആലപ്പുഴേലെ എന്റെ വീടിനടുത്ത്, നട്ടപ്പാതിരയ്ക്ക് ഓംലെറ്റടിക്കാന്ന് കരുതി തട്ടുകട വരെ ഒന്ന് പോയതാ.... നോക്കുമ്പോ എന്റെ കുഞ്ഞമ്മാവന്‍‌റ്റെ മകള്‍ , അവളുടെ വീടു കൊല്ലത്താണു കെട്ടോ,
ലെവള്‍ ഒരുത്തന്റെ ബൈക്കിന്‍‌റ്റെ പുറകില്‍ കെട്ടിപ്പിടിച്ച് വരുന്നു,  കസ്റ്റഡീലെടുത്ത് ചോദ്യം ചെയ്തപ്പോ നൈറ്റ്ഡ്യൂട്ടിക്ക് തിരുവനന്തോരത്ത് ടെക്നോപ്പാര്‍ക്കില്‍ പോണ അവരെ അപമാനിച്ചൂന്നും പറഞ്ഞ് രണ്ടൂടെ എന്നെക്കൊന്നില്ലെന്നേ ഒള്ള്,

പിന്നെ സദാചാരപോലീസ് എന്നൊക്കെ വിളിച്ച്  അവളപ്പനും ആങ്ങളേം കൂടെ എന്നാ ബഹളമാരുന്നെന്നോ ...
എനിക്കാലോചിച്ചിട്ട് പിടി കിട്ടാത്തത് ഒറ്റക്കാര്യമാ കോതേ, തിരുവനന്തോരത്ത് പോണ്ട അവളെന്തിനാ കൊല്ലത്തൂന്ന് ആലപ്പുഴ വന്നേ ? എന്തരോ എന്തോ...

പിന്നെ കപടസദാചാരത്തേക്കുറിച്ചുള്ള നിശിതവിമര്‍ശനങ്ങള്‍ കേട്ടപ്പോഴാണു കാലത്തിനൊത്ത് പുരോഗമിക്കാത്തതിനേക്കുറിച്ചും, ഇതിനു മുന്‍പ് അവിഹിതബന്ധങ്ങള്‍ പാപമാകുന്നു എന്ന് പലര്‍ക്കും ഉപദേശിച്ചതിന്‍‌റ്റെ ശരിയില്ലായ്മയും മാറ്റിചിന്തിക്കുന്നതിന്‍‌റ്റെ ആവശ്യകതയെക്കുറിച്ച് എന്നെ ബോധവാനാക്കിയത്.

പിന്നെ ഞാനിതിനേക്കുറിച്ച് തീവ്രമായ പഠനത്തിലായിരുന്നു.
ന്യൂജനറേഷന്‍ സിനിമകള്‍ കാണുക, സൈബര്‍ ഫെമിനിസ്റ്റുകളുടെയും അവരുടെ വാലേതൂങ്ങികളായ ബുദ്ദിജീവികളുടെയും ലേഖനങ്ങള്‍ വായിക്കുക, അതിനൊക്കെ ലൈക്കടിക്കുക, ഹാങ്ങൗട്ടാവുക, അവരുടെ ശില്പ്പശാലകളില്‍ പങ്കെടുത്ത് ഉത്ബോധിതനാകുക അങ്ങിനെയൊക്കെ,

എന്റെ പെണ്ണുമ്പിള്ള ഇപ്പോ ആരെ എത്ര നട്ടപ്പാതിരയ്ക്ക് വിളിച്ച് എത്ര മണിക്കൂര്‍ കത്തിവെച്ചാലും അതിന്റെ ന്യൂജനറേഷന്‍ വശം മനസ്സിലാക്കാന്‍ എന്റെ മനസ്സ് പ്രാപ്തമായിരിക്കുന്നു. അതുകൊണ്ട് വല്ലാത്ത ശാന്തിയും സമാധാനവുമാണു എന്റെ വീട്ടീല്‍!!!

പിന്നെ കുഞ്ഞമ്മാവന്‍‌റ്റെ മകളെ ഞാന്‍ കഴിഞ്ഞാഴ്ച വിളിച്ച് ക്ഷമാപണം നടത്തിയപ്പോള്‍ എന്തൊരാശ്വാസം കിട്ടിയെന്നോ.

അവിഹിതബന്ധങ്ങളേക്കുറിച്ചുള്ള സംശയനിവാരണത്തിനു വിളിക്കുന്നവരെ ഇപ്പോള്‍ ഞാന്‍ പ്രോത്സാഹിപ്പിക്കാറാണു പതിവ്..
ഇതില്‍ നമ്മള്‍ മനസ്സിലാക്കേണ്ട അല്ലെങ്കില്‍ ശ്രദ്ദിച്ചിരിക്കേണ്ട ഘടകം സ്ത്രീയുടെ താത്പര്യമാണു,
അതായത് ഈ റിലേഷനില്‍ സ്ത്രീക്ക് തിരിച്ച് ഇഷ്ടമാണെങ്കില്‍ അത് വിശുദ്ദവും പ്രോത്സാഹിക്കപ്പെടേണ്ടതുമാണു, അവളുടെ ക്രൂരനായ ഭര്‍ത്താവിനു എന്തോ ഒരു കുറവുണ്ടെന്നും അതയാളുടെ തെറ്റാണെന്നും നാം മനസ്സിലാക്കണം.

അതിനെ എതിര്‍ക്കുന്നവര്‍ ആരായിരുന്നാലും കപടസദാചാര തീവ്രവാദിയാണു കോതേ.

പിന്നെ, നാട്ടിലെ സ്ത്രീകളുടെ കാര്യത്തില്‍ നാട്ടുകാര്‍ എടപെടണ്ട കാലമൊക്കെ പഴഞ്ചനായി എന്നു മനസ്സിലാക്കൂ. അഥവാ എന്തെങ്കിലും പ്രശ്നമുണ്ടെങ്കില്‍ തന്നെ അവരവര്‍ തന്നെ വേണ്ടതു തീരുമാനിച്ച് കൊള്ളും, സുനാപ്പി കട്ട് ചെയ്യാനൊക്കെ അവരില്‍ പലരും പരിശീലനം നേടിക്കഴിഞ്ഞു

കോതയ്ക്ക് ഇപ്പോള്‍ കാര്യം മനസ്സിലായെന്ന് കരുതുന്നു, കോതയ്ക്കില്ലാത്തതെന്തോ തങ്കയ്ക്ക് ഗോപി നല്‍കുന്നുണ്ട്, ആയതിനാല്‍ അവരെ ബുദ്ദിമുട്ടിക്കാതെ ഒരു ന്യൂജനറേഷന്‍ വ്യ‌ക്തി ആവാന്‍ ശ്രമിക്കൂ.. കൂടുതല്‍ ന്യുജനറേഷന്‍ സിനിമകള്‍ കാണുക, ലേഖനങ്ങള്‍ വായിക്കൂക.

പിന്നെ , കുന്നുമ്മല്‍ ശാന്തേടെ വീട്ടില്‍ ഞാനും പോകുന്നുണ്ട്.. നമ്പര്‍ തരാം ..

പൊളിറ്റിക്കല്‍ ഡിസൈനിംങ്ങ് അസ്സിസ്റ്റന്റ് - ടെക്നിക്കല്‍

( ബൂലോകത്തില്‍ വായിക്കാന്‍ http://boolokam.com/archives/43617 )

അരീം തിന്ന് ആശാരിച്ചിയേം കടിച്ച് !
എന്നിട്ടും അവസാനം പട്ടിക്ക് മുറുമുറുപ്പ്.

ആവശ്യം കഴിയുമ്പോ ലീഗ് അഭിസാരികയാണെന്ന് (ഐ മീന്‍ കറിവേപ്പില ഒണ്‍ലി പരിപ്രേക്ഷ്യംസേ) നവമന്ത്രി ഉവാചയായത് കേട്ടിട്ട് അദ്ദാണു ഓര്‍മ്മ വന്നത്.

നോക്കുകുത്തി സംഘടനകള്‍ പോലും സമുദായക്കുളത്തില്‍ മീന്‍ പിടിക്കാന്‍ വരുന്നതു കണ്ടിട്ട്, നമ്മളായിട്ട് ആദ്യമേ കലക്കി മാക്‌സിമം പിടിക്കുക എന്ന ഒറ്റ ടാര്‍ജറ്റിലാണു സമതുലനം പാലിച്ച് പാവം ഹസ്സനിക്കയും, മമ്മദിക്കയും ഇടപെട്ടത് അല്ലേല്‍ പെടീച്ചത്.

ആടിനെ പട്ടിയാക്കല്‍ ഇതുവരെ കേരളപോലീസിന്റ്റെ മാത്രം പരിപാടിയാണെന്നാണു എല്ലാവരും ധരിച്ചത്.
 വര്‍ഗ്ഗിയവാദിയുവത്വം അതിക്രൂരമായി ഫോട്ടോഷോപ്പില്‍ മിസ്റ്റര്‍ ആടനെ ഡോഗനാക്കി മാറ്റി ബോര്‍ഡൊക്കെ വച്ചുകളയുമെന്ന് പ്രതീക്ഷിച്ചില്ല.
ഒന്നൂല്ലേലും ഇലക്ഷന്‍ വരുമ്പോ ഒറ്റക്കരളല്ലേ!!!!

സംഗതി സത്യത്തില്‍ കലാത്മകമായിരുന്നു,

ട്രെന്‍ഡ് അനുസരിച്ച്,ഒരു പക്ഷേ, നാളെ അങ്ങ് കാസര്‍ഗോഡ് തൊട്ട് കന്യാകുമാരി വരെ,
 കേരളത്തിലങ്ങോളമിങ്ങോളം പോസ്റ്റര്‍ മല്‍സരങ്ങളില്‍ നിറഞ്ഞ് നില്‍ക്കാന്‍ പോണതു പലരീതിയില്‍ മോര്‍ഫിംങ്ങ് ചെയ്യപ്പെട്ട ഇടതു വലത് നടു നേത്യത്തങ്ങളാവും എന്ന് പ്രവചിക്കാം.

ഓരോരുത്തര്‍ക്കും സ്വഭാവമനുസരിച്ച് ഉടലാവാന്‍ ഏതൊക്കെ പക്ഷിമ്യഗാദികള്‍ക്കാവും ഭാഗ്യമുണ്ടാവുക എന്ന് ചിന്തിച്ച് കോതയ്ക്ക് കുളിരു കോരുന്നു.
ഒരുദാഹരണത്തിനു നമ്മുടെ ജോര്‍ജ്ജൂട്ടിച്ചായനു പറ്റിയ ഒരേ ഒരു മ്യഗം കാണ്ടാമ്യഗമാവില്ലേ ?

ഭാവനയും കഴിവും ഒത്തിണങ്ങിയ രാഷ്ട്രീയകലാകാരന്മാര്‍ ഒരു പോസ്റ്റര്‍ വിപ്ലവം തന്നെ നടത്തി സുന്ദരകേരളത്തെ അതീവസുന്ദരവും വര്‍ണ്ണശബളവുമാക്കും. ടൂറിസം വളരും..

ഡിസൈനിംങ്ങ് സോഫ്റ്റ്‌വെയര്‍ പരിഞ്ജാനമുള്ള യുവാക്കള്‍ക്ക് ഒരു തൊഴിലവസരമായി കണ്ട് പൊളിറ്റിക്കല്‍ ഡിസൈനിംങ്ങ് അസ്സിസ്റ്റന്റ് ടെക്‌നിക്കല്‍ എന്ന ഒരു തസ്തിക സ്യഷ്ടിക്കാവുന്നതാണു…
അല്ലേല്‍ പാര്‍ട്ടിക്ലാസ്സുകളില്‍ ഇനി ഫോട്ടോഷോപ്പ്, കോറല്‍ഡ്രോ, ആട്ടോക്കാഡ്,കാറ്റിയ, ഫ്‌ലക്‌സ് ബോര്‍ഡ് നിര്‍മ്മാണം,പ്രിന്റിംങ്ങ് തുടങ്ങിയവ പഠിപ്പിക്കാം.

പക്ഷേ സങ്കടം ഉണ്ട് സര്‍… ഒറ്റപ്പെട്ട് പോയത് പാവം ചുരളിയാണു…

ഒരു പ്രശ്‌നത്തില്‍ ഇടപെടാന്‍ വന്ന അദ്ദ്യേത്തെ എല്ലാരൂടെ സന്തോഷ്പണ്ടിറ്റിനുള്ള പരിഗണന പോലും കൊടുത്തില്ല.

എട്ടാം ക്ലാസ്സില്‍ പഠിക്കുന്ന ടൈം, പെലെ ആവാന്‍ തീവ്രമായി കൊതിച്ചിട്ടും, കളി അറിയില്ല എന്ന ഒറ്റക്കാരണത്താല്‍ എന്നെ ടീമില്‍ നിന്ന് ചവുട്ടിപ്പുറത്താക്കിയത് പോലെ, കേരളം ആ യുവകോമളനോട് ഇങ്ങനെ ചെയ്യരുത്!!!!
ഗോപുമോന്‍ പോലും ഇത്ര വേദന അനുഭവിച്ചിട്ടുണ്ടാവില്ല.

ഉച്ചാണ്ടിയുടെ ഒന്‍പതാം തിരു-അടവ്!!!

 

ഹേയ്…. ഇവിടെ വാ…

അടിയന്‍.

അപ്പോ പറഞ്ഞ പോലെ, താന്‍ പോയി ആ രണ്ടാം താര്‍ക്കികനെ ഈ വാദത്തില്‍ നിന്ന് മാറ്റി എന്നെഴുതി വച്ച തുണ്ട്കടലാസ് കൊണ്ടുവാ… മാധ്യമ മൂരാച്ചികള്‍ക്ക് കൊടുക്കട്ടെ….

അടിയന്‍..
കേട്ടൊ മിസ്റ്റര്‍ ഉച്ചാണ്ടി, താങ്കളുടെ അടവ് എനിക്ക് ഭേഷായി ഇഷ്ടപ്പെട്ടു. ഒരു പട്ടും വളയും തരുന്നുണ്ട്..

റാന്‍, എല്ലാം അവിടുത്തെ ക്യപ.

മാധ്യമ മൂരാച്ചികള്‍ കേന്ദ്രന്റ്റെ മലക്കം മറിച്ചില്‍ എന്നോ മറ്റോ പറയില്ലേ ? ആരെങ്കിലും പ്രതികരിക്കുമോടോ ?

ഒരിക്കലുമില്ല, ഏറ്റവും സര്‍ക്കുലേഷനുള്ള പേപ്പര്‍ പോലും അഭിഭാഷകന്റ്റെ മലക്കം മറിച്ചില്‍ എന്നേ എഴുതൂ എന്നുറപ്പ് തന്നിട്ടുണ്ട്.
 പ്രബുദ്ദരാണെന്ന് കാണിക്കാന്‍ നാട്ടുകാര്‍ തെറി വിളിക്കാറുണ്ടെങ്കിലും നല്ല അസ്സലു മഞ്ഞപ്പത്രമായ ആ സാധനമേ സിപീമ്മുകാര്‍ പോലും വായിക്കാറുള്ളു.

ആഹാ…

ആ സൈബര്‍ ഗുണ്ടകളോ? ഫേസ്ബുക്ക് ഒക്കെ നിരോധിക്കേണ്ടി വരുമോ ?


കഷ്ടം!!! അങ്ങ് എന്തറിഞ്ഞിട്ടാണു പറയുന്നത് ? പാവങ്ങള്‍!!!!!
അവര്‍ക്ക് ന്യൂജനറേഷനും, മായാവിയും, സൈബര്‍ ഫെമിനിസവും തന്നെ ധാരാളമാണു.
ഇവറ്റകള്‍ക്കൊക്കെ സത്യത്തില്‍ ചെറിയ ഒരുതരം മാനസികരോഗമാണു, ആരേലും എന്തേലും പറഞ്ഞാല്‍ അതിന്റ്റെ പുറകേ പോകും, മടുക്കുമ്പോ പഴേ പോലാവും, പുറത്തിറങ്ങി ഒരു മുദ്രാവാക്യം വിളിക്കാന്‍ പോലും കൊള്ളൂല്ലാന്ന്!!!

ഇവറ്റകളെ വിശ്വസിച്ച ആ ഹസാരെയെ നമ്മള്‍ ഒതുക്കിയില്ലേ? രണ്ടാമത്തെ നിരാഹാരമായപ്പോഴേക്കും എല്ലാത്തിനും ബോറടിച്ചതു നാം കണ്ടതല്ലേ. എന്തിനു പറയണം,
നമ്മള്‍ പോലും ഒന്ന് ചൊറിയണം എന്ന് ആഗ്രഹിച്ച മമതയെ ഇവര്‍ ചൊറിഞ്ഞതു കണ്ടില്ലേ? ആയമ്മക്ക് വട്ടിളകി നടക്കുകയാണു പാവം
.
സത്യത്തില്‍ ഇവരാണു നമ്മുടെ പുണ്യം. വേണ്ട പോലെ ഉപയോഗിച്ചാല്‍ മതി. ഓരോ ജില്ലാ ഭാരവാഹിക്കും അഞ്ച് വ്യാജപ്രോഫൈല്‍ വരെ നിര്‍ബന്ധമാക്കിയിട്ടുണ്ട് എന്തായാലും…

മറ്റ് എതിര്‍പ്പുകള്‍ എന്തെങ്കിലും ?

സമുദായസമവാക്യം പാലിച്ചതു കൊണ്ട് ഒരു കുഴപ്പവുമില്ല.
പിന്നാ എണ്‍പതുകാരന്‍ പഴേ പോലെ തൊള്ള തുറക്കും. ആരു കേള്‍ക്കാന്‍ ???????? എന്‍ എഫ് വര്‍ഗ്ഗിസ് പണ്ട് നരസിംഹത്തില്‍ പറഞ്ഞ ഒരു ഡയലോഗ് ഓര്‍മ്മ വരുന്നു
 (അനുകരിച്ച് കാട്ടുന്നു: ‘എന്തു കണ്ടിട്ടാടീ!!!!!!!!!!! ഒണ്ടാക്കിയ തന്തയ്‌ക്കോ വേണ്ട’)

ഹോ… എന്തായാലും ഒര്‍ല്പ്പം ആശ്വാസമായി…….
ആയമ്മയുടെം ബിഷപ്പുമാരുടെയും ഒരു ചൊറിച്ചിലിനു ശക്തി ഇപ്പഴാ കുറഞ്ഞതു. ഇറ്റലി ഇറ്റലി എന്ന് കേട്ട് ഞെട്ടി ഉണരുകയായിരുന്നു ഉറക്കത്തില്‍പ്പോലും.
പെണ്ണുമ്പിള്ള തൊഴിച്ചില്ലെന്നേയുള്ളു.
ഒരു പിറവം തിരഞ്ഞെടുപ്പിനു വേണ്ടി എന്തൊക്കെ സഹിച്ചു.

ആ ശെല്‍വന്‍ നെയ്യാറ്റിങ്കരയില്‍ തോല്‍ക്കുമോടോ ?

തോറ്റാലെന്ത് ജയിച്ചാലെന്ത് ? നുമ്മ പിറവം സെക്യുറാക്കിയില്ലേ ? തിരുമേനി തന്ന ഡെഡ്‌ലൈന്‍ എക്സ്റ്റന്‍ഡ് ചെയ്യാന്‍ പെട്ട പാട് എനിക്കേ അറിയൂ!!

ആ ഇറ്റലിക്കാരെവിടെ ?

ഞാനിങ്ങ് വരുംമ്പോ അവര്‍ ഫോട്ടോയ്ക്ക് പോസു ചെയ്യുന്നുണ്ടാരുന്നു. ടൂര്‍ കഴിയുന്നേനു മുന്‍പ് കുമരകത്ത് പോയി ഹൗസ്‌ബോട്ടിലൊക്കെ കേറ്റണമെന്ന് .
കേറ്റാം കേറ്റാം!!!!

എന്തൊക്കെയാണേലും, ആ മുല്ലപ്പെരിയാര്‍ പ്രശ്‌നത്തില്‍ കോതണ്ഡപാണനെ വച്ച് താന്‍ പരീക്ഷിച്ച് വിജയിച്ചതാണെന്ന് മീറ്റിംങ്ങില്‍ പറഞ്ഞിട്ടും എനിക്കങ്ങോട്ട് വിശ്വാസം അത്ര പോരാരുന്നു..

ഇതൊക്കെ അത്രേ ഉള്ളെന്ന്.. അവന്മാരുടെ മലക്കം മറിയലിനുശേഷം നുമ്മ എന്ത് പറഞ്ഞാലും ഒന്നും മിണ്ടരുതെന്ന് ഈ കോതണ്ഡപാണികളുമായി ഒരു മുദ്രപ്പത്രത്തി അങ്ങ് എഴുതി വാങ്ങിക്കും,
കേസ് കോടതിയില്‍ ദുര്‍ബലമാകുക എന്ന പരമമായ ആവശ്യം കഴിഞ്ഞാ ആരുടെ കണ്ണില്‍ പൊടിയിടാനും എന്തു വേണേലും നമുക്കും പറയാം,
  പിന്നെ കൊറച്ച് കാലം കഴിഞ്ഞ് ഇവനൊക്കെ ഒരു പ്രമോഷന്‍ അങ്ങ് കൊടുക്കും. അല്ല പിന്നെ!!!

പാരലലായി ചത്തവരുടെ അകന്ന ബന്ധുക്കളുമായി ഒത്ത്തീര്‍പ്പ്ചര്‍ച്ചകള്‍ നടക്കുന്നു എന്ന് കേട്ടല്ലോടോ,

ശരിക്കും കോടികള്‍ കൊടുക്കുമോടോ ഇവറ്റകള്‍ ?

കോടി പണ്ടേ പുതപ്പിച്ചതല്ലേ ? ഇനി ആരു കൊടുക്കാന്‍!!

തന്റ്റെ ബുദ്ധി അപാരം തന്നെ…

ഓ ഇതൊക്കെ എന്ത്!!!!!


ബൂലോകത്തില്‍ വായിക്കാന്‍:- http://boolokam.com/archives/43257